॥ ૐ ॥
તમારી ને મારી પ્રીત, લાગી જુઓ જુગની,
હૃદયમાં પ્રેમ આપ્યો, અરજી સૂણી દીનની. –
વિશ્વાસ બેઠો સાચો, હૃદય આનંદ ઊર્મિ,
શોક મોહ તમે નસાડો, શ્રદ્ધા આપી મર્મી. –
તમારું જ્ઞાન અર્પી દેવા, ઉદારતા વાપરી,
પ્રેમસ્વરૂપ ધરી આવ્યા, પ્રત્યક્ષ આપ હરી. –
જ્ઞાન, ધ્યાન ભક્તિનો, પ્રેમ ઠાંસી ભરવા,
પ્રેમથી દોડી આવ્યા, આપ પ્રભુ તારવા. –
ભરતી આપના પ્રમેની, અદ્ભૂત લઈ આવ્યા,
દર્શન કરતાં સહુનાં, હૃદયો હરખાયાં. –
હૃદયનાં અંધારાં હરણ સહુનાં કરવા,
જ્ઞાનનો ખજાનો લાવ્યા, જ્યોતિ સહુમાં ભરવા. –
રાગ, દ્વેષ કાઢી દૂર, સદગુણ દીપાવ્યા,
એવી ખેતી કરી આપે, સહુનાં દિલ રિઝાવ્યાં. –
ભ્રમ ભેદ, ખેદ કાઢી, સાચો રંગ ચડાવ્યો,
વિવેક, વૈરાગ્ય આપી, સત્ ઝંડો ફરકાવ્યો. –
ગર્વને ગાળી, વાસના સમૂળી બાળી,
અજ્ઞાન રાત ગઈ કાળી, સદાની થઈ દિવાળી. –
॥ ૐ ॥