॥ ૐ ॥
નાદ જાગૃતિ
(રાગ : ગરબો : પ્રસાદ)
ગુંજે ગુંજે પૂર્ણ, પ્રભુનો નાદ
ત્યારે જાણવો પ્રભુનો પ્રસાદ …. ટેક,
પાપ, તાપ સઘળાં, દૂર જ ભાગતા
જ્યારે પ્રભુમાં, દિન-રાત જાગતા
મસ્ત ગુંજન એ, પ્રભુનો જ સાદ …. ત્યારે જાણવો ૧
પ્રભુનો પ્રસાદ મળે, અંતરમાં શાંતિ
રહે ન કદાપિ કોઈ, મમતાની ભ્રાંતિ
અજ્ઞાન સમૂળું દૂર જ થાય
જ્ઞાનનો પ્રવાહ, દિવ્ય ભળાય
ભગાડે મોહ-શોક, બ્રહ્મનો જ નાદ …. ત્યારે જાણવો ર
શક્તિ ને ભક્તિમાં, ઊણપ ન રહેતી
તૃપ્તિ સદાય રહે ઉત્તમ ભાવ ભરતી
ઓટની ખોટ તો, નજરે ન આવે
પ્રેમાનંદ અદ્ભૂત, પ્રભુ વર્ષાવે
રસામૃતનો મધુર, અનોખો સ્વાદ …. ત્યારે જાણવો ૩
જ્યોતિ સ્વરૂપ પ્રભુ, અચળ રહેતા
હૃદયમાં પ્રગટ બની, માર્ગ સત્ય કહેતા
સતત ચોકી એની,પલ નથી ખસતી
સાચી છે વાત એમ, હૃદયમાં ઠસતી
મુકાવે અવિનાશી, વાદવિવાદ …. ત્યારે જાણવો ૪
પ્રભુનું ધ્યાન રહે, સૌના અવાજમાં
ભૂલે ન કોઈને, સમજાવે સાનમાં
પ્રભુજી પોતાની, દૃષ્ટિ આપીને
ભરતા કૃપાળુ સાચી સમજને
સંયમ સાથે જ, પ્રભુનો પ્રસાદ …. ત્યારે જાણવો પ
॥ ૐ ॥