તમને આવે હસવું એવું

સાંભળો મારો સાદ પ્રભુને ખૂબ કરું છું યાદ;

અહંકારે અમને ભુલાવ્યા, બહુ કર્યા વાદ.

   તમને આવે હસવું એવું, દુ:ખ કોને જઇને કહેવું ? ….ટેક

વિઘ્નના માથે ગાંસડા લીધા ને મોહના લાગેલાં બાણ;

સત્સંગમાં અમે સમજ્યા નહિ, ને માયાની માંડેલ કાણ.

   તમને આવે હસવું એવું, દુ:ખ કોને જઇને કહેવું ? ….ટેક

તારી માયાવી નાટકશાળામાં, વિધવિધ જાતના ખેલ

એક પળમાં ઉત્પન્ન કરવું, ને સંહાર કરવો સહેલ.

   તમને આવે હસવું એવું, દુ:ખ કોને જઇને કહેવું ? ….ટેક

મોહ- નિદ્રાની સોડમાં સૂતા ને ભૂલ્યા તમારું નામ;

અનેક રૂપે એક છો ઇષ્ટ, ધન્ય તમારાં કામ.

  તમને આવે હસવું એવું, દુ:ખ કોને જઇને કહેવું ? ….ટેક

કરોડ જોજન દૂર વસે પ્રભુ, એવો થાય આભાસ;

દિવ્ય દઁષ્ટિ આપજો એવી, હ્રદયે કરીએ તપાસ.

  તમને આવે હસવું એવું, દુ:ખ કોને જઇને કહેવું ? ….ટેક

દઁષ્ટિથી ન​વ અળગા રહો, એક ઘડી મારા નાથ્;

પાસે વસનારાને દયા કરીને, પકડી લો મારા હાથ.

  તમને આવે હસવું એવું, દુ:ખ કોને જઇને કહેવું ? ….ટેક

હ્રદયમાં જુએ પ્રભુજી , એમાં માયા છેત્તરી જાય;

શરણે થનારને ઉગારવાનો, કોલ દીધો ગીતામાંય.

  તમને આવે હસવું એવું, દુ:ખ કોને જઇને કહેવું ? ….ટેક

ન્યાય કારી તને ડિગ્રી આપી, અન્યાય તુજથી ન થાય;

એવી ક્રુરતા કરી નથી, તેથી ભક્તો તારા ગુણ ગાય.

તમને આવે હસવું એવું, દુ:ખ કોને જઇને કહેવું ? ….ટેક

માયાવી ખેલો બહુ જોયા, મારી આંખને ફોડી નાખ;

અંધ બનાવી કબૂલ કરો, મને તારી જ પાસે રાખ.

   તમને આવે હસવું એવું, દુ:ખ કોને જઇને કહેવું ? ….ટેક

દુ:ખથી ભૂલ્યા ભાન વિભુ, હ​વે રૂપ તારું બતાવ;

માયાવી નાટક બંધ કરીને, ઝાઝું હ​વે ન સતાવ.

  તમને આવે હસવું એવું, દુ:ખ કોને જઇને કહેવું ? ….ટેક

સહુ ભક્તોને ભીડ પડી, તારું ભીડભંજન છે નામ;

ગુરુ તણો વિશ્વાસ છે સાચો, સિધ્ધ બનસે સહૂ કામ.

  તમને આવે હસવું એવું, દુ:ખ કોને જઇને કહેવું ? ….ટેક