વહેલાં પધારો પ્રભુજી મારા ને સાચું બતાવોને જ્ઞાન;
મોહ-પડળને કાપી નાખી, સાચી બતાવોને સાન.
નયનમાં નિશ-દિન રહેવા, દયાળુ આવજો દેવા…ટેક
આંખમાંથી અશ્રુધારા પડે ને તેનાથી કરાવું સ્નાન;
વચન પાળતા પતિત્તપાવન, શું ઘટશે ભગવાન?
નયનમાં નિશ-દિન રહેવા, દયાળુ આવજો દેવા….
હોંશ હ્રદયમાં છે ઘણી મારે, ગુણ તમારા ગવાય;
કાળના મુખમાં આવતાં પહેલાં, ગુણ તારા ન ભૂલાય.
નયનમાં નિશ-દિન રહેવા, દયાળુ આવજો દેવા….
કોઇ ભયંકર માંદગી આવે ને સ્મરણ તમારું થાય;
વેદના દેહની ભૂલી જઇને, ભજન કરીએ સદાય.
નયનમાં નિશ-દિન રહેવા, દયાળુ આવજો દેવા….
અતંરદ્રષિટથી નીરખવા ,તમને બતાવો તમારું સ્વરૂપ;
સાકાર, નિરાકાર થઇને, ભકતો કાજે, ધર્યા અનેક રૂપ.
નયનમાં નિશ-દિન રહેવા, દયાળુ આવજો દેવા….
ગુણાતીત સ્થિતિ બને અમારી, રહે આંનદ અપાર;
સદગુરુ શબ્દના સંપૂણઁ પ્યાસી, સદા રહે હોંશિયાર.
નયનમાં નિશ-દિન રહેવા, દયાળુ આવજો દેવા….
ઇન્દ્રિયો અમારી શાંત બને ને લેશ ન રહે વિકાર;
નિર્વિકારી બનાવવાને, સદા કરીએ પડકાર.
નયનમાં નિશ-દિન રહેવા, દયાળુ આવજો દેવા….
ભાન ભુલાવી ભવ સાગરમાં, કદી હવે ન સતાવ;
તુજને કદી ભૂલું નહિ, એવો મારા હ્રદયમાઁ ભાવ.
નયનમાં નિશ-દિન રહેવા, દયાળુ આવજો દેવા….
યોગી નીરોગીમાં આપ છો વ્યાપક, સમજીને ધરીએ ધ્યાન;
નિદાન સાચું સમજાવી દઇને, પ્રજ્ઞાથી આપો જ્ઞાન.
નયનમાં નિશ-દિન રહેવા, દયાળુ આવજો દેવા….
તારી દયાનો સદાય ભિખારી, બન્યો છે કિરતાર;
ભજન કરતાં દેહ પડે, મને તારા નામનો આધાર.
નયનમાં નિશ-દિન રહેવા, દયાળુ આવજો દેવા….