મન ધારણ ધીરજ કરીને, પ્રભુમાં રાખજો પ્યાર;
અંત સમયનો, એ જ છે સાથી, ભૂલતાં થાશો ખુવાર
વિભુ કરો પ્રીતડી એવી, મુકાવી મુકાય નહિ તેવી
ખોટી વસ્તુને સાચી સમજીને ભટકવા નિત્ય જાય;
દોડા દોડી બહુ કરિને, જગમાં હાંસી થાય.
વિભુ કરો પ્રીતડી એવી, મુકાવી મુકાય નહિ તેવી
ઘડીક વૈભવ મોહ જ લાગેને, ત્યાગના આવે વિચાર;
અનેક ભાતના રંગ ચડયા, તેમાં ભૂલી ગયો કિરતાર.
વિભુ કરો પ્રીતડી એવી, મુકાવી મુકાય નહિ તેવી
વિધવિધ જાતના ખાધપર્દાથને, ખાવામાં મન લલચાય;
રોગ આવીને ઘેરી જ લેત્તા, મન ઘણું જ અકળાય.
વિભુ કરો પ્રીતડી એવી, મુકાવી મુકાય નહિ તેવી
હાથી- ઘોડા ને બાગ- બગીચા, અંગ રક્ષક હોશિયાર;
એવા માનવી મ્રુત્યુની આગળ, બની ગયા લાચાર .
વિભુ કરો પ્રીતડી એવી, મુકાવી મુકાય નહિ તેવી
લક્ષ ચોરાસી ફેરાઓ ફરતાં ને મનની ભ્રમણા અપાર;
હવે ભટકવું છોડી દઇને, ભૂલીશ ન તું ગમાર.
વિભુ કરો પ્રીતડી એવી, મુકાવી મુકાય નહિ તેવી
વેદ શાસ્ત્રની વાત ન સમજે, ને ઉપદેશ સૂણે અનેક;
એવા પાપી ફટકેલા મનને, લેશ ન ગમે વિવેક.
વિભુ કરો પ્રીતડી એવી, મુકાવી મુકાય નહિ તેવી
સાચી શિખામણ આપે મનને, તેના ઉપર કરે ક્રોધ;
સમજાવનારો થાકી જાય, મનને લાગે નહિ બોધ.
વિભુ કરો પ્રીતડી એવી, મુકાવી મુકાય નહિ તેવી
વાસના ભરેલી દેહની સાથે, મનને બંધાણો પ્યાર;
સાચા સદગુરુ નહિ મળે, તો લઈ જાશે નરક દ્ગાર.
વિભુ કરો પ્રીતડી એવી, મુકાવી મુકાય નહિ તેવી
સર્વ શક્તિમાનને જાણી, અંખડ આંનદ વર્તાય;
અનેક યુગોના ભૂલા પડેલા, બીજા કોની પાસે જાય.
વિભુ કરો પ્રીતડી એવી, મુકાવી મુકાય નહિ તેવી
તારી બનાવેલી માયામાં ભૂલી, શરણે રહેતા સદાય;
જીવનમુક્ત બનાવો અમને, માયા સ્વપ્ને ન ભળાય.
વિભુ કરો પ્રીતડી એવી, મુકાવી મુકાય નહિ તેવી
સહુ ભક્તોનાં હ્રદયમાંહીં, અનેક તરંગો થાય;
પ્રેરક બેઠો પ્રેરણા કરે, તેમાં જઇને સમાય.
વિભુ કરો પ્રીતડી એવી, મુકાવી મુકાય નહિ તેવી