॥ ૐ ॥
(રાગ : જૈજૈવંતી કલ્યાણ ગરબી)
(ભૂત, ભવિષ્ય, વર્તમાન ત્રણે કાળના જ્ઞાનને સાચી સમજ તારી હોવાથી યુગનો જૂનો તું જ જગદ્ગુરુ છે એ સ્પષ્ટ આપે શ્રીમુખે ગીતામાં દર્શાવ્યું છે. એ શ્રીકૃષ્ણને જ જગદગુરુ તરીકે માનીને જ આ પ્રાર્થના કરવાની છે. એમાંથી જરૂર પ્રકાશ અને શાન્તિ શીધ્ર મળે છે.)
હે શ્રીકૃષ્ણ પરમ કૃપાળુ,
પૂર્ણાનંદ તું એક પ્રભુ,
સર્વજ્ઞ, સર્વશ્વર સાચા,
હૃદયેશ્વર પ્રેરક તું વિભુ -૧
ભક્તિયોગ તપ તેજે પ્રકાશે
પ્રાણશક્તિ સત્ તું આપે,
રક્ષા તારી ક્ષણ નથી હઠતી,
સિદ્ધ કર્મ શુદ્ધ તું જ છાપે – ર
તારી હાજરી પડદો હઠાવી,
પ્રત્યક્ષ કરવા પ્રગટ કરે,
કદી અજ્ઞાન નહિ ટકશે,
જ્ઞાન પ્રકાશ તું ઠાંસી ભરે – ૩
વાણી વર્તનમાં સમજ તમારી
અડગ અવિચળ ઘાટ ઘડે,
તારો ઘાટ કદી નથી તૂટતો,
સફળ વિજય, નહિ વિધ્ન નડે – ૪
મન બુદ્ધિમાં તારી કળાનો,
નિશ્ચય નિર્ણય સમજ પડે,
અખંડ આનંદ કદી નહિ હઠશે,
મન-પ્રાણ બાંધ્યા તુજ તાર વડે – પ
અમૂલ્ય ભાવથી તારા શરણે,
શ્વાસને તુજ સાથે જ ગમે,
લક્ષ ને દૃઢતા તુજમાં સ્થિર છે,
મોહ, શોકમાં તે નહિ જ ભમે – ૬
એક જ નિષ્ઠા તુજમાં રહેવું,
વૃત્તિનો દોર નિત્ય અમર કરે,
ભય પછી નથી રહેવાનો,
ચોક સતત તારી કેમ ડરે – ૭
તારા બળથી તું જ જિવાડે,
પાછું ડગલું નહિ જ ભરે,
હિંમત તારી પ્રેમથી આપે,
અભય અમલથી બધાં જ તરે – ૮
જગદ્ગુરુ તું યુગનો જૂનો,
યુગેયુગે તું સુધારો કરે,
તારો અમર બોધ જ તારે,
ગીતાનાં વાક્યો નહિ જ ફરે – ૯
મહર્ષિ સાત, ચાર સનકાદિક,
તેનો આદિ તું જ ખરે,
એના યોગક્ષેમ રક્ષા તારી,
સહાય સાચી તું જ કરે – ૧૦
તારા સ્વરૂપને તું જ જણાવે,
તુજને ત્યારે જ જાણી શકે,
તારા ધામમાં રાખ તું પોતે,
કોઈ નહિ જ હટાવી શકે – ૧૧
તારી ને મારી પ્રભુ પ્રીતિ જૂની,
તુજને ભૂલું તે ભૂલો બધી,
ધ્યાન રાખીને તું નહિ ભૂલતો,
મેળ મેળવી કર તું સંધિ – ૧ર
॥ ૐ ॥
જય સદગુરૂ 🙏🌹🌸🌻🙏