॥ ૐ ॥
બ્રાહ્મણ કુળની ને આદિ એ મૂળની,
બ્રહ્મ તેજથી દીપાવી જ્યોતિ સતની,
પ્રાણ શુધ્ધ, ગર્વ ગાળી, વાસના બાળીને,
રાગ દ્વેષ તજી, અખંડ પ્રેમ વધારીને …. ૧
બ્રહ્મભાવથી હૃદય જેનું, ભીંજાણું એવું,
બ્રહ્મભાવ શ્રધ્ધા-સંયમ, સમતામાં રહેવું,
મંથન આત્મજ્ઞાન ખાતર, સાચી એક શોધમાં,
વેદ શાસ્ત્રનો સાર, વૃત્તિ વાળી ભીતરમાં …. ર
સ્થિરતા અચળ, પૂર્ણનો સંદેશો સીધો,
પૂર્ણતાનો સમજીને, માર્ગ ઉત્તમ લીધો,
પૂર્ણમાંથી આવ્યા, પોષણ પૂર્ણનું લઈને,
પૂર્ણતામાં એક થાવું, સંપૂર્ણ પૂર્ણ રહીને …. ૩
જન્મને કર્મની દિવ્યતા, અમર દીપાવી આપે,
અવિનાશી ભાવ આપનો, દેહની જડતા કામે,
ચૈતન્ય રંગથી રંગાઈ, ચૈતન્ય ભાવ જગાડવો,
યુગોનાં અંધારા ટાળી, સાચો રાહ બતાવવો …. ૪
ધન્ય તમારાં માતા-પિતા, કોટિકોટિ વંદન કરીએ,
ભક્તિ-યોગ-જ્ઞાન તપમાં નંબર પહેલે રહીએ,
ઊર્ધ્વ ગતિથી પ્રાણનો, બ્રહ્મસંબંધ રાખવો,
મોહ-શોકથી દૂર રહી, ભીતર પ્રેરણા સાચવો …. પ
મંત્રબળથી દેવી-દેવતા પ્રગટ બોલાવ્યાં,
દર્શન દઈ વાતો કરતા, જીવન શુધ્ધ બનાવ્યાં,
કર્મ શું કરવું ન કરવું, વાદવિવાદ તજતા,
હાથની હથરોટી એવી, સાચું ગ્રહણ કરવા …. ૬
સ્થિરતા બુદ્ધિની, સાથ શાંતિનો રાખતા,
ખોટી વસ્તુ મેળવવાની ઈચ્છા કાઢી નાખતા,
સંતોષી, તૃષ્ણાત્યાગી લોભને તજતા,
વૃત્તિને અડોલ બનાવી, બ્રહ્મ સંબંધ બાંધતા …. ૭
પાયાની કેળવણી, પાયામાં ધર્મસિંચન સતનું,
સત બીજનું વૃક્ષ ફળતું, ભાવિ જ્ઞાનામૃતનું,
જ્ઞાનવિજ્ઞાન તૃપ્તં બની તૃપ્ત કરતા,
અમર લખાણા લેખો, પ્રેરણા ઉત્તમ ભરતા …. ૮
તમારી વાણીથી ગજગજ છાતી ફુલાતી,
ધન્ય ધન્ય દિવ્ય જીવન, વિશુદ્ધ પ્રેમ ભરતી,
દિવ્ય દૃષ્ટિથી અમી ભરેલી, આંખ સહુની ઠારતી,
યુગોના અંધારા ટાળી, અમૃત સિંચન કરતી …. ૯
ઉત્તમ અવસર જન્માષ્ટમી, એકતા કરવા આવ્યો,
રાગ-દ્વેષ છોડી હૃદયથી, હૃદય તાર બાંધી લો,
ઘણાં વર્ષો વીત્યાં, દેશપરદેશ, જ્ઞાન જ્યોતિ દીપાવી,
ઢંકાયેલી જ્યોતિ, ઘણાં વર્ષોની, ફરી શોભાવી …. ૧૦
॥ ૐ ॥